चिनियाँ कम्युनिस्ट पार्टी (सीपीसी) स्थायी समितिको राष्ट्रिय जनकंग्रेसका अध्यक्ष ली हान्शु आज नेपाल आउंदै हुनुहुन्छ । चिनियाँ राष्ट्रपति सी चिनफिङका विश्वासपात्र लीको भ्रमणमा सरकारले सुरक्षाको विशेष व्यवस्था मिलाएको छ ।

रुस, मंगोलिया हुँदै नेपाल आउने लागेका लि, नेपालबाट दक्षिण कोरिया हुँदै चीन फर्कने कार्यक्रम रहेको छ । मन्त्रीस्तरका ६ नेतासमेत रहेको लीको १०० जनाको जम्बो भ्रमण टोली विशेष विमानमा नेपाल आउन लागेको हो । ली चिनियाँ संविधानअनुसार दोस्रो वरीयता र चिनियाँ कम्युनिस्ट पार्टी (सीपीसी) को तेस्रो वरीयतामा पर्छन् ।

अध्यक्ष लीले आज सभामुख अग्निप्रसाद सापकोटासँग द्विपक्षीय भेट वार्ता गर्नेछन् । द्विपक्षीय वार्ताका दौरान नेपालको संघीय संसद् र चीनको राष्ट्रिय जनकंग्रेसबीचमा द्विपक्षीय सहकार्य र भ्रमण आदानप्रदानका सम्बन्धमा सम्झौता हुने गृहकार्य भइरहेको संसद् सचिवालयकाले जानकारी दिएको छ । सभामुख सापकोटाले लीको सम्मानमा आज रात्रिभोज आयोजना गर्नेछन् । अध्यक्ष लीले मंगलबार प्रधानमन्त्री एवं कांग्रेस सभापति शेरबहादुर देउवा , राष्ट्रिय सभाका अध्यक्ष गणेश तिमिल्सेना र परराष्ट्रमन्त्री नारायण खड्कासँग भेटवार्ता गर्ने कार्यक्रम रहेको छ ।

अध्यक्ष लीले बुधबार राष्ट्रपति विद्यादेवी भण्डारीसँग शीतल निवासमा भेटवार्ता गर्नेछन् । सोही दिन एमाले अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहालसँग छुट्टाछुट्टै भेट्ने कार्यक्रम समेत रहेको छ । परराष्ट्र मन्त्रालयका अनुसार ली बिहीबार नेपालबाट फर्कने कार्यक्रम तय भएको छ ।