केहिदिन यतादेखि परेको अविरल वर्षाको कारण आएको बाढी र पहिरोले देशभारको जनजीवन प्रभावित बनेको छ। बाढी र पहिरोको कारण दर्जनौं घरमा क्षति पुगेको छ भने धेरै घर परिवार विस्थापित भएका छन्।

गएरातिदेखि परेको अविरल वर्षासंगै आएको बाढी र पहिरोले दार्चुलामा दर्जनौं घर परिवार विस्थापित भएका छन्। महाकाली नदी र लास्कु खोलामा आएको बाढिले एकै घरका चार जना सहित ७ जना वेपत्ता भएको र पाँच जनाको मृत्य भएको प्रहरीले जनाएको छ।

बाढीले खलङ्गा हुँदै दुहुँ व्याँस जोड्ने सडक र दार्चुला तिङ्कर सडकअन्तर्गत रिङ्गलतालदेखि कलौनभीरसम्म सडक अवरुद्ध बनेको छ। महाकाली तटबन्ध हुँदै निर्माण गरिएको दार्चुला तिङ्कर सडक पूर्णरुपमा क्षति भएको छ भने, लास्कु खोलामा निर्माण गरिएको मोटेरबल पुल र झोलुङ्गे पुल बगाएको छ। खलंगास्थित दशरथनगर आधारभूत विद्यालय पनि बाढिले बगाएको छ ।

दार्चुला तिङ्कर सडकमा राति पार्किङ गरी राखिएका पाँचवटा जिप, एक ट्र्याक्टर र एक ट्रली बगाएको स्थानीयले बताएका छन्।