राष्ट्रियसभाका चार विषयगत समितिको सभापतिका लागि उम्मेदवारी दर्ता भएको छ ।सबै समितिका लागि एक-एक जनाको मात्रै उम्मेद्वारी परेको छ।

बिहिबार निर्वाचन हुने तय गरिएको भएपनि सबै पदको लागि एक-एक जनाको मात्रै उम्मेद्वारी परेपछि मनोनयन सर्वसम्मत भएको छ।

राष्ट्रियसभाको विधायन व्यवस्थापन समितिको सभापतिमा एकीकृत समाजवादी पार्टीका महासचिव बेदुराम भुसाल र राष्ट्रिय सरोकार समितिको सभापतिमा एमालेकी पार्वती रावल (दिलकुमारी) मनोनयनमा परेका छन् ।

त्यस्तै, प्रत्यायोजित व्यवस्थापन तथा सरकारी आश्वासन समितिको सभापतिमा माओवादी केन्द्रका मायाप्रसाद शर्मा मनोनित भएका छन् ।

दिगो विकास तथा सुशासन समितिको सभापतिमा नेपाली कांग्रेसका प्रकाश पन्थ मनोनयन भएका छन् ।

५९ सदस्यीय राष्ट्रियसभा सदस्यका लागि प्रत्येक दुई/दुई वर्षमा एक तिहाइ सदस्यका लागि निर्वाचन हुन्छ। राष्ट्रियसभाको नियमावलीमा एक तिहाइ सदस्यको पद रिक्त भएपछि समिति पुनर्गठन र सभापति हेरफेर गर्नुपर्ने व्यवस्था रहेको छ।