जिल्ला अदालत, नवलपुरले अभिनेता पल (पूर्ण विक्रम) शाहलाई बाल यौन दुरुपयोगको मुद्दामा साढे २ वर्षको सजाय सुनाएको छ ।

शाहलाई अदालतले बलात्कारको मुद्दामा सफाइ दिएको फैसला गरेपनि बाल यौन दुरुपयोगको मुद्दामा भने दोशी करार गरेको हो। यज्ञप्रसाद आचार्यको इजलासले पीडितलाई १० लाख रुपैयाँ क्षतिपूर्ति भराउन र २५ हजार रुपैयाँ जरिवाना तिराउनेगरि फैसला सुनाएको हो ।

अदालतले जबर्जस्ती करणीको मुद्दामा सफाइ दिए पनि बाल यौन दुरुपयोगमा अढाई वर्ष कैदको फैसला गरेपछि शाहले पुनरावेदन गर्ने उनको वकिलले बताएका छन्।

”पल शाहले पनि मैले करणी गरेकै छैन भनेका छन्। पीडित भनिएका नाबालिगले पनि मसँग पल शाहले करणी नै गरेका छैनन्, हाम्रो बीचमा त्यस्तो सम्बन्ध नै छैन भनिसकेकी छन्। यो अवस्थामा पनि बाल यौन दुरुपयोग भनेर अढाई वर्ष कैदको फैसला न्यायसंगत नभएको र कसुर प्रमाणित हुनु पर्ने शाहका वकिलले बताएका छन्।