सत्तारुढ कन्जरभेटिभ पार्टीको नेतृ लिज ट्रस बेलायतको राजनीतिक इतिहासमा तेस्रो महिला प्रधानमन्त्री बन्ने भएकी छन्।

कन्जरभेटिभ पार्टीको नेतृत्वका लागि सोमबार भएको आन्तरिक मतदानमा प्रतिद्वन्द्वी ऋषि सुनाकलाई पराजित गरेपछि ट्रस बेलायतको आगामी प्रधानमन्त्री बन्ने निश्चित बनेको छ। निर्वाचनमा ट्रसले ५७ प्रतिशत मत प्राप्त गरेकी थिइन् भने उनका प्रतिद्वन्द्वी ऋषि सुनाकले ४२ प्रतिशत मत प्राप्त गरेका थिए।

पार्टीभित्रै विवादमा तानिएका बोरिस जोन्सनले गत जुलाइमा प्रधानमन्त्री पदबाट राजीनामाको घोषणा गरेका थिए। जोन्सनलाई प्रतिस्थापन गरेर कन्जरभेटिभ पार्टीको नेतृत्व र प्रधानमन्त्रीको पद सम्हाले पनि, जोनसनको नीतिहरूप्रति असन्तुष्ट भएकाहरूले ट्रसलाई जोन्सनकै राजनीतिक विरासतको उत्पादन भएको र कुनै नयाँ र अद्भुत परिवर्तनको अपेक्षा गर्न नसकिने टिप्पणी गरेका छन्।

बेलायतको राजनीतिक इतिहासमा ट्रस तेस्रो महिला प्रधानमन्त्री हुनेछिन्। मार्ग्रेट थ्याचर सन् १९७५ देखि १९९० सम्म बेलायतको पहिलो महिला प्रधानमन्त्री बनेकी थिइन भने,थेरेसा मे सन् २०१६ देखि २०१९ सम्म बेलायतको दोस्रो महिला प्रधानमन्त्री बनेकी थिइन्।