बुढानिलकण्ठ नगरपालिका वडा न. १३ का मतदाताहरुले, काँग्रेस नेता गगन थापालाई चुनाव जिताउन ७५५ जना मतदाताको नाम मतदाता सूचीबाट हटाउन खोजेको भन्दै जिल्ला निर्वाचन कार्यालय काठमाडौँमा तोडफोड गरेका छन्।

जिल्ला निर्वाचन कार्यालय काठमाडौँले मतदाता नामावली सङ्कलन गर्दा झुट्टा विवरण पेश गरेको र सो विरुद्द उजुरी परेको भन्दै, सुचना टाँस गरिएको मितिले २४ घण्टाभित्र सक्कल नागरिकता, बसाइसराइ वा विवाह दर्ताको प्रमाण-पत्र लिएर निर्वाचन कार्यालयमा उपस्थित हुन सूचना जारि गरेको थियो।

कांग्रेस महामन्त्री तथा सोही क्षेत्रका सांसद गगन थापाको दबाबमा निर्वाचन कार्यालयले मतदातालाई त्रसित बनाउने काम गरेको बुढानिलकण्ठ नगरपालिकाकी उपमेयर अनिता लामाले बताउनुभएको छ। आयोगले मतदातालाई टेलिफोन गरेर तिम्रो नाममा पुर्जी काटिएको छ,सक्कल कागजात सहित उपस्थित हुनु भन्दै त्रसित बनाएको पनि लामाले बताउनुभएको छ। फर्जी उजुरीका आधारमा एमाले समर्थक भनेर चिनिएका मतदाता, कार्यकर्ता र कार्यपालिका सदस्यसम्मलाई किर्ते मतदाता भनेर छानी छानी हटाउन खोजिएको लामाले बताउनुभएको छ।

मेयर मिठाराम अधिकारी, उपमेयर अनिता लामा, वडाध्यक्षहरु नवराज भट्टराई र सुमित्रा पाण्डे सहित निर्वाचन कार्यालय पुगेका आक्रोशित मतदाताहरुले उजुरी गर्नेको परिचय खुलाउन माग गर्दै निर्वाचन कार्यालयमा नाराबाजी र तोडफोड गरेका छन् ।