राष्ट्रिय सभाको बाह्रौं अधिवेशन अन्तर्गतको ५० औँ बैठक आज दिउँसो २:५९ मा बस्ने संघीय संसदका महासचिव भरतराज गौतमले जानकारी दिनुभएको छ।

राष्ट्रिय सभाको आजको सम्भावित कार्यसूचीमा ५ वटा विषयहरूबारे छलफल गरिने कार्यसूची सार्वजनिक गरिएको छ।

आजको सम्भावित कार्यसूचीमा अर्थमन्त्री जनार्दन शर्माले ‘बिमा विधेयक २०७५ र सार्वजनिक ऋण व्यवस्थापन विधेयक २०७६ माथि विचार गरियोस्’ भन्ने प्रस्ताव पेस गर्ने कार्यक्रम रहेको छ भने, राष्ट्रिय सभा सदस्य देवेन्द्र दाहालले ‘राज्यका निर्देशक सिद्धान्त, नीति र दायित्वको कार्यान्वयन, अनुगमन तथा मूल्यांकन समितिको वार्षिक प्रतिवेदन २०७६ र एकीकृत प्रतिवेदन २०७९ प्रस्तुत गर्ने कार्यसूची रहेको छ।

त्यसैगरी,कृषिमन्त्री मृगेन्द्रकुमार सिंह यादवले ‘पशु स्वास्थ्य तथा पशु सेवा परिषद् विधेयक, २०७६ माथि विचार गरियोस्’ भन्ने प्रस्ताव पेस गर्ने र भौतिक पूर्वाधारमन्त्री मोहम्मद इस्तियाक राईले ‘शहरी क्षेत्र सार्वजनिक यातायात (व्यवस्थापन) प्राधिकरण विधेयक, २०७६ माथि प्रतिनिधि सभाबाट प्राप्त संशोधनउपर विचार गरियोस्’ भन्ने प्रस्ताव प्रस्तुत गर्ने कार्यक्रम रहेको छ।
आजको सम्भावित कार्यसूचीमा शिक्षामन्त्री देवेन्द्र पौडेलले ‘योगमाया आयुर्वेद विश्वविद्यालय विधेयक, २०७९ लाई प्रतिनिधि सभाबाट भएको संशोधन स्वीकार गरी पुनः पारित गरियोस्’ भन्ने प्रस्ताव पेस गर्ने पनि उल्लेख गरिएको छ।