राष्ट्रिय सभाको आज बस्ने बैठकमा सम्माननिय राष्ट्रपति विद्यादेवी भण्डारीद्वारा पुनर्विचारका लागि फिर्ता गरिएको नागरिकता विधेयकको सम्बन्धमा राष्ट्रपति कार्यालयबाट प्राप्त पत्रको व्यहोरा जानकारी गराइने भएको छ।

दिउँसो १:०१ बजे बस्ने आजको बैठकमा राष्ट्रिय सभाका सचिव राजेन्द्र फुयालले राष्ट्रपतिबाट सन्देशसहित फिर्ता भएको विधेयकको बारे जानकारी गराउने कार्यसूची रहेको छ। त्यसैगरी,फुयालले नागरिकता विधेयकको सम्बन्धमा प्रतिनिधि सभाबाट प्राप्त सन्देश पनि जानकारी गराउने आजको कार्यसूचीमा उल्लेख गरिएको छ। त्यसपछि राष्ट्रिय सभामा नागरिकता विधेयकको विषयमा छलफल अगाडी बढ्नेछ।

राष्ट्रपति विद्यादेवी भण्डारीले १५ बुंदे सन्देश सहित पुनर्विचारको लागि फिर्ता पठाउनु भएको नागरिकता विधेयक प्रतिनिधि सभाको भाद्र २ गतेको बैठकले हुबहु पारित गरेर राष्ट्रिय सभामा पठाएको हो।

विधेयक पुन: संसदबाट पारित भएर प्रमाणीकरणको लागी राष्ट्रपतिकोमा पठाइएमा, यस पटक विधेयक फिर्ता गर्ने संवैधानिक अधिकार भने राष्ट्रपतिलाई दीइएको छैन।