निर्वाचन आयोगले आज राजनीतिक दलका प्रतिनिधिसँग निर्वाचन आचारसंहिताबारे छलफल गरेको छ।

आयोगले व्यवस्था गरेको निर्वाचन आचारसंहितामा संघीय सरकार, प्रदेश सरकार र स्थानीय कार्यपालिकाका पदाधिकारी र कुनै पनि मन्त्रीलाई मुख्य प्रचारकको रुपमा अनुमति नदिने बताएको छ।

त्यसैगरी सवारी साधन प्रयोग गर्दा अपनाउनु पर्ने आचरणमा, प्रतिनिधिसभा र प्रदेशसभा निर्वाचनका लागि प्रत्येक राजनीतिक दलका दुई मुख्य प्रचारकले मात्र हेलिकप्टर प्रयोग गर्न पाउने बताएको छ। त्यसको लागि दुईजना मुख्य प्रचारकको नाम आयोगमा बुझाउनुपर्ने र आयोगले अनुमति दिएको मुख्य प्रचारकले मात्र हेलिकप्टर सेवा प्रयोग गर्न पाउने बताएको छ।

प्रचारप्रसारका क्रममा कुनैपनि उम्मेदवारले निर्वाचन अधिकृतको स्वीकृति लिएर सम्बन्धित निर्वाचन क्षेत्रमा दुई पाङ्ग्रे वा तीन पाङ्ग्रे वा चार पाङ्ग्रे विधुतीय तथा यान्त्रिक सवारी प्रयोग गर्न सक्ने बताएको छ। सवारी साधन नचल्ने ठाउँमा बढीमा चारवटा घोडा प्रयोग गर्न सकिने र प्रचारका क्रममा ‘विदेशी नम्बर प्लेट भएका सवारी साधनलाई अनुमति नदिइने जनाएको छ।

उम्मेदवारको नाममा अनुमति लिएको सवारी साधन अन्य दल वा उम्मेदवारले प्रयोग गर्न नहुने र उम्मेदवारले परयोग गर्ने सवारीमा मतदाता ओसारपसार गर्न नपाइने व्यवस्था गरेको छ ।

निर्वाचन आयोगले चुनाव प्रचारप्रसारमा २५ जनाभन्दा बढी व्यक्ति सहभागी हुन नपाउने प्रस्ताव समेत अघि सारेको छ ।

मनोनयनपत्र दर्ता गर्दा नै आफ्नो सम्पती विवरण बुझाउनुपर्ने

त्यसैगरी अनुमानीत चुनावी खर्च र स्रोतका बारेमा मनोनयनपत्र दर्ता गर्दा नै जानकारी गराउनुपर्ने जनाएको हो ।
उम्मेदवारहरुले मनोनयनपत्र दर्ता गर्दा नै आफ्नो सम्पती विवरण र व्यक्तिगत विवरण बुझाउनुपर्ने व्यवस्था समेत आयोगले गर्न लागेको छ ।