वैदिक सनातन धर्मावलम्बीहरुले आज हिन्दु धर्म संस्कृती अनुसार श्रीकृष्णको पूजा–आराधना गरी श्रद्धा–भक्तिपूर्वक श्रीकृष्ण जन्माष्टमी पर्व मनाउँदैछन् ।

द्वापरयुगमा भाद्र कृष्ण अष्टमीको मध्यरातमा वासुदेव र देवकीको सन्तानका रुपमा मामा कंशको कैदमा जन्मिएका ज्ञानयोग, कर्मयोग र भक्तियोगका प्रणेता भगवान् श्रीकृष्णको जन्म भएको आजको दिनलाई ‘श्रीकृष्ण जन्माष्टमी’ पर्वको रुपमा मनाउने गरिन्छ।

आजको दिन देशभरिका कृष्णमन्दिरमा भगवान् श्रीकृष्णको पूजा–आराधना गर्न श्रादालु भक्तजनहरुको घुइंचो लाग्ने गरेको छ। हिन्दु धर्म संस्कृती अनुसार अन्याय, अत्याचार र दैत्य प्रवृत्तिबाट सम्पूर्ण मानवको रक्षा गर्न भगवान् विष्णुको आठौँ अवतारका रूपमा श्रीकृष्णको जन्म भएको मानिन्छ।मथुरा नरेश कृष्णलाई उनको जन्मको रात नै मामा कंशबाट बचाउन उनको पिताले यमुना नदि पार गरि गोकुलमा लगेर राखेको धार्मिक ग्रन्थहरुमा उल्लेख गरेको पाइन्छ।

आजको दिन भगवान् कृष्ण सँग-सँगै राधाको पनि पुजा अर्चना गरिन्छ। रुकमिणीसंग वैवाहिक बन्धनमा बाँधीए पनि भगवान् कृष्ण र राधाको प्रेम सम्बन्धको वर्णन गर्ने गरिन्छ।

पाण्डव र कौरवहरूबीच कुरुक्षेत्रमा भएको युद्धको क्रममा अर्जुनलाई उपदेश दिने क्रममा पवित्र ग्रन्थ श्रीमद्भागवत गीताको उत्पति भएको धार्मिक विश्वाश रही आएको छ।
श्री मद्भाग्वत गीतामा कृष्णले अर्जुनलाई भनेका छन्ः
यदा यदा ही धर्मस्य, ग्लानिर्भवति भारत
अभ्युत्थानम् धर्मस्य, तदात्मनं सृजाम्यहम्

अर्थात्ः
जब जब संसारमा धर्मको नाश हुँदै गएर अधर्म हावी हुँदै जान्छ,
तब तब धर्मको रक्षाकालागि म स्वयम यस धर्तीमा नयाँ अवतार लिएर आउनेछुँ ।