दक्षिण तथा मध्य एसिया मामिलाका लागि अमेरिकी सहायक विदेशमन्त्री डोनाल्ड लु बिहिबार नेपाल आउने भएका छन्।

नेपालमा स्टेट पार्टनरसिप प्रोग्राम (एसपीपी) लाई लिएर विवाद चर्किरहेको बेला दक्षिण तथा मध्य एसियाली मामिलाका लागि अमेरिकी सहायक विदेशमन्त्री डोनाल्ड लु २ दिने भ्रमणका लागि बिहिबारनेपाल आउने भएका छन्। भ्रमणका क्रममा उनले प्रधानमन्त्री शेरबहादुर देउवा र परराष्ट्रमन्त्री नारायण खड्कासँग भेटवार्ता गर्ने कार्यक्रम रहेको छ । तर, उनको नेपाल भ्रमणबारे अन्य विस्तृत जानकारी भने खुलाइएको छैन ।

यसअघि उनले संसदबाट एमसीसी सम्झौता अनुमोदन गराउन महत्वपूर्ण भूमिका खेलेको बताइंदै आएको छ । तर एमसीसी सम्झौतालाई फेब्रुअरी २८ सम्ममा अनुमोदन गर्न नेपाली नेताहरूसँग छुट्टाछुट्टै टेलिफोन वार्ता गरेको र वाशिङटनले नेपालसँगको सम्बन्धको समीक्षा गर्ने र सम्झौता अनुमोदन गर्न नेपाल असफल हुनुको पछाडि चीनको हात रहेको बुझिने भन्ने धम्की दिएको भन्ने माओवादी नेता प्रचण्डको खुलासापछि उनको चर्को आलोचना समेत भएको थियो।