स्थानीय तहमा ३४ प्रतिशत मत प्राप्त गरेको नेकपा एमालेले बहुमत प्राप्त गर्न बाँकी १६ प्रतिशतको लागि चुनावी रणनीति तयार गरिरहेको बेला , प्रदेश र प्रतिनिधिसभाको निर्वाचनमा पनि गठबन्धन गरेरै जाने सत्तारुढ दलहरुको निर्णयले नेकपा एमाले यतिखेर दबाबमा परेको छ।

सत्तारुढ गठबन्धनसँग एक्लै भिड्ने तर सत्ता प्राप्तिका लागि मात्र कसैसंग गठबन्धन नगर्ने बताउंदै आएको नेकपा एमाले यतिखेर सर्तसहित तालमेल गर्ने पक्षमा देखिएको छ। सत्तारुढ दलहरुले संघ र प्रदेशको निर्वाचनमा पनि चुनावी तालमेल गर्ने संकेत पाएको एमालेले लोकतन्त्र र राष्ट्रियतालाई बलियो बनाउने उद्देश्यमा सहमत हुने जुनसुकै शक्तिसँग तालमेल गर्ने नीति अघि सारेको छ। एमालेले पार्टीको जनाधार बलियो भएको ठाउँमा एक्लै लड्ने र बाँकी क्षेत्रमा गठबन्धनलाई हराउन सक्ने गरि तालमेल गर्ने रणनीतिमा अघि बढ्ने संकेत गरको छ।

काँग्रेससंगको गठबन्धन तोडेर आए पुन वामपन्थी दलहरुबीच एकता गर्न सक्ने भन्दै अनौपचारिक छलफल गर्दै आइरहेको नेकपा एमालेले सात वटै प्रदेशमा निर्वाचन लक्षित प्रशिक्षण पनि सुरु गरेको छ ।नेकपा एमाले एकातर्फ पार्टी प्रवेश र निर्वाचन लक्षित प्रशिक्षणलाइ अगाडि बढाईरहेको छ भने अर्को तर्फ नेकपाबाट छुट्टीएर गएका एकीकृत समाजवादी र माओवादीका दोश्रो पंक्तिका नेताहरूलाई फिर्ता बोलाउने प्रयासमा समेत रहेको छ।