चिनियाँ कम्युनिष्ट पार्टीको अन्तर्राष्ट्रिय सम्पर्क विभागका प्रमुख लिउ जियानचाओ र प्रधानमन्त्री शेर बहादुर देउवाबीच आज भएको भेटमा, जियानचाओले नेपाली भूमिमा चीनविरोधी गतिविधि हुन नपाओस् भन्ने धारणा व्यक्त गरेका छन् भने प्रधानमन्त्री देउवाले नेपाल एक चीन नीतिप्रति प्रतिबद्ध रहेको बताउनुभएको छ।

प्रधानमन्त्री देउवाले नेपालमा रहेको दलाइ लामाको कार्यालय आफुले नै बन्द गराएको स्मरण गराउंदै नेपाली भूमिमा चीन विरोध कुनै पनि गतिविधि हुन नदिने बताउनुभएको छ।

भेटको क्रममा लिउ जियानचाओले कुनै पनि देशसँग चीनको सम्बन्ध विचारधाराद्वारा निर्देशित नहुने भन्दै नेपालका सबै राजनीतिक दलहरुसँग सहकार्य गर्न र नेपालमा जुन पार्टीको सरकार भए पनि चीन सदैव साथ रहने बताउनुभएको छ।

जियानचाओ र प्रधानमन्त्रीबीच भएको भेटमा नेपाल–चीन सम्बन्ध लगायत द्विपक्षीय आपसी हितका विषयमा छलफल भएको परराष्ट्र मन्त्रालयले जनाएको छ।