चिनियाँ कम्युनिष्ट पार्टीको अन्तर्राष्ट्रिय सम्पर्क विभागका नवनियुक्त प्रमुख लिउ जियानचाओ नेपाल आइपुग्नुभएको छ।

आज बिहान एयर चाइनाको विमानबाट करिब ११ बजे त्रिभुवन अन्तर्राष्ट्रिय विमानस्थलमा अवतरण गर्नुभएको जियानचाओलाई परराष्ट्र मन्त्रालयका डेपुटी चिफ अफ प्रोटोकल रेवती पौडेल र प्रमुख दलका विदेश विभागका नेताले स्वागत गरेका थिए।

६ सदस्यीय चिनियाँ टोली सहितको यो भ्रमणमा नेपाल–चीन सम्बन्धका साथै दुई पक्षीय हितका विषयमा छलफल हुने बताइएको छ।

चारदिने नेपाल भ्रमणका क्रममा जियानचाओले आजै प्रधानमन्त्री शेरबहादुर देउवा र परराष्ट्रमन्त्री डा. नारायण खड्कासँग भेट गर्ने कार्यक्रम रहेको छ।

उनले राष्ट्रपति विद्यादेवी भण्डारी, माओवादी केन्द्रका अध्यक्ष पुष्पकमल दाहाल, नेकपा एमालेका अध्यक्ष के पी ओली लगायतका नेताहरुसंग पनि भेट गर्ने कार्यक्रम रहेको छ।

तस्विर: रासस