सोमबार रातिदेखि परेको अविरल वर्षाको कारण देशभरको जनजीवन प्रभावित बनेको छ भने सयौं घर-परिवार विस्थापित हुन पुगेका छन्।

अविरल वर्षापछि देशको पूर्वी क्षेत्रका विभिन्न नदीमा आएको बाढीले दुई हजारभन्दा बढी घर डुबानमा परेको छ भने सयौं घर परिवार विस्थापित हुन पुगेका छन्।झापामा हजारभन्दा बढी घर डुबानमा परेका छन् । लगातारको वर्षाले इटहरी नगरपालिकामा मात्र २ सय घर डुबानमा परेको छ भने अविरल वर्षासँगै आएको बाढीका कारण विराटनगर र कटहरीमा १७५ परिवार विस्थापित भएका छन् । राजधानी काठमाडौँ लगायत देशका विभिन्न सहरहरुमा पानीको उचित निकाश नहुँदा सहरका मुख्य क्षेत्र नै डुबानमा परेका छन्। अविरल वर्षासँगै आएको बाढी र पहिरोको कारण देशका मुख्य राजमार्ग र सडकहरु अवरुद्ध बनेको छ भने नियमित हुने हवाई सेवाहरु पनि खराब मौसमको कारण प्रभावित भएको छ।

बाढीका कारण विस्थापित भएकाहरूलाई सुरक्षित स्थानमा सारिएको भएपनि अविरल वर्षाको कारण खोलाको सतह बढेकोले खोला किनारका बस्तीहरुलाइ उच्च सतर्कता अपनाउन प्रहरीले आग्रह गरेको छ ।