सिसडोलदेखि बञ्चरेडाँडासम्मको सडक मर्मत गर्नुपर्ने भएकाले आज र भोलि (मङ्गलबार र बुधबार) काठमाडौं उपत्यकाको फोहोर व्यवस्थापनको काम प्रभावित हुने भएको छ ।

नुवाकोटको सिसडोल जाने बाटोमा फोहोर थुप्रिएकाले बञ्चरेडाँडा जाने बाटोमा समस्या आएपछि आज र भोलि फोहोर सङ्कलन बन्द गरिने भएको छ । सिसडोलबाट दुई किलोमिटर टाढा रहेको बञ्चरेडाँडा पुग्न सवारीसाधनले फोहोरको थुप्रो पार गर्नुपर्ने बाध्यता रहेको छ भने लगातारको वर्षाका कारण त्यसमा कठिनाई भएको छ ।

काठमाडौं महानगरपालिकाको वातावरण विभागले उपत्यकाबाट फोहोर ओसारपसार गर्दा दुर्घटना हुने खतरा रहेकाले काम रोकेर सरसफाइ गर्न लागेको जनाएको छ ।