भरतपुर चितवन ,एक्स्पर्ट एजुकेसन एण्ड भिसा सर्भिसेस प्रालि भरतपुरको सहकार्यमा विमोचन इभेन्ट एण्ड इन्टरटेनमेन्ट प्रालिले आयोजना गरेको सात दिने उदघोषण तथा व्यक्तित्व विकास तालिम समापन भएको छ ।

एक्स्पर्ट एजुकेसन एण्ड भिसा सर्भिसेस प्रालिको सभाहलमा असार ४ गते देखि सञ्चालित उद्घोषण तथा व्यक्तित्व विकास तालिम शुक्रबार एक औपचारिक कार्यक्रम बिच समापन गरिएको हो ।

कार्यक्रममा प्रमुख अतिथि वडा नम्बर १९ का नवनिर्वाचित वडा अध्यक्ष प्रकाश तमाङ्गले उद्घोषण तथा व्यक्तित्व विकास तालिमले समाजमा निकै सकारात्मक प्रभाव पार्ने र बोल्ने कलाको बिकास गर्न थप उर्जा प्रदान गर्ने बताउनुभयो । साथै, उहांले यस्ता सामाजिक कार्यक्रमहरुमा आफ्नो र वडाको तर्फ़बाट पनि सहकार्य गर्न सदैव अग्रसर रहने प्रतिवद्धता व्यक्त गर्नुभएको छ ।

कार्यक्रममा विशिष्ठ अतिथीको रुपमा एक्स्पर्ट एजुकेसन एण्ड भिसा सर्भिसेसका किरण पौडेल, अतिथिको रुपमा भरतपुर १९ का नवनिर्वाचित वडा सदस्य राजकुमार गुरुङ ,भरतपुर १ का नवनिर्वाचित वडा सदस्य राजु गुरुङ लगायतका अतिथिहरुको उपस्थिती रहेको थियो ।

७ दिनसम्म संचालन भएको प्रशिक्षणमा चितवनका चर्चित सञ्चारकर्मीद्धय मनोज घिमिरे र प्रवेश अधिकारीले प्रशिक्षण दिनुभएको थियो । यस्तै, कार्यक्रममा सहभागिहरुलाई समापनको अवसरमा सफलताको शुभकामनासहित प्रमाणपत्र र मायाको चिनो प्रदान गरिएको थियो ।

विमोचन इभेन्ट एण्ड इन्टरटेनमेन्ट प्रालिका अध्यक्ष विमोचन आचार्यको अध्यक्षतामा भएको समापन समारोहमा स्थानिय निर्वाचनमा निर्वाचित हुनुभएका भरतपुर १९ का वडा अध्यक्ष प्रकाश तामांग, वडा सदस्य राजकुमार गुरुङ, दिलमाया थापा मगर, सिता विक र भरतपुर १ का नवनिर्वाचित वडा सदस्य राजु गुरुङलाई सम्मान समेत गरिएको छ।