अफगानिस्तानको पक्तिका प्रान्तमा गएको भूकम्पमा परी कम्तीमा २५० जनाको मृत्यु भएको छ भने सयौं घाइते भएका छन्। 

भूकम्प दक्षिण पूर्वी सहर खोस्टबाट ४४ किलोमिटर टाढा गएको बताइएको छ।  अमेरिकी भूगर्भ सर्वेक्षणका अनुसार भुकम्प करिब ५१ किलोमिटर गहिराइमा रहेको र ६.१ म्याग्निच्युडको रहेको जानकारी प्राप्त भएको छ।  अफगानिस्तान, पाकिस्तान र भारतको ५०० किलोमिटरभन्दा बढी क्षेत्रमा भूकम्पको धक्का महसुस गरिएको युरोपेली भूमध्यसागरीय भूकम्प विज्ञान केन्द्रले जनाएको छ। भूकम्पले घरहरु ध्वस्त बनाएको छ। क्षतीको पूर्ण विवरण आइनसकेकोले मृत्यु हुने र घाइतेहुनेहरुको संख्या थप बढ्न सक्ने  अनुमान गरिएको छ। 

सरकारी प्रवक्ता बिलाल करीमीले ट्वीट गरेका छन्,”दुर्भाग्यवश, हिजो राति पक्तिका प्रान्तका चार जिल्लामा ठूलो भूकम्प आयो, जसले हाम्रा सयौं देशवासीको ज्यान लियो र घाइते बनायो  र दर्जनौं घरहरू ध्वस्त पारे,”  ।”हामी सबै सहायता एजेन्सीहरूलाई थप प्रकोप रोक्नको लागि तुरुन्तै टोली पठाउन आग्रह गर्दछौं।”