केहिदिन अघि सामाजिक सञ्जालमार्फत आफुले सञ्चार कर्म छोडेर राजनीतिमा लाग्ने घोषणा गर्नुभएका चर्चित सञ्चारकर्मी रवि लामिछानेले आज एक औपचारिक कार्यक्रमकाबिच राष्ट्रिय स्वतन्त्र पार्टीको घोषणा गर्नुभएको छ।

राष्ट्रिय सभागृहमा आयोजित कार्यक्रममा सञ्चारकर्मी लामिछानेले आफू व्यवस्था बदल्न नभइ, नागरिकको अवस्था बदल्न राजनीतिमा आएको र अहिले भएका कुनै पनि राजनीतिक दलमा नलाग्ने बताउंदै नयाँ पार्टी “राष्ट्रिय स्वतन्त्र पार्टी ” घोषणा गर्नुभएको हो।

सञ्चारकर्मी लामिछानेले आफु ठुला ठुला कुरा नभई, आम मान्छेको ससाना समस्या समाधानका लागि राजनीतिमा आएको पनि बताउनुभएको छ।

सञ्चारकर्मी लामिछानेले अहिलेका राजनीतिक दल र तिनका नेताहरुले नागरिकको जनमत गुमाउँदा पनि गठबन्धन गरेर सत्तामा बसिरहने प्रपञ्च गरिरहेको आरोप समेत लगाउनुभएको छ।