सुदूरपश्चिम प्रदेश सरकारले आगामी आर्थिक वर्ष २०७९/८० को लागि ३६ अर्ब ७४ करोड रुपैयाँको बजेट विनियोजन गरेको छ।

आर्थिक मामिला मन्त्री प्रकाश रावलले प्रस्तुत गर्नुभएको आर्थिक वर्षको बजेट अन्तर्गत चालु खर्चतर्फ १२ अर्ब २९ करोड अर्थात ३३.४६ प्रतिशत र पुँजीगत खर्चतर्फ २४ अर्ब १४ करोड ४७ लाख अर्थात ६५.७४ प्रतिशत रकम विनियोजन गरिएको छ । वित्तिय हस्तान्तरणतर्फ भने एक अर्ब ३६ करोड बजेट विनियोजन गरिएको छ ।

प्रदेश सरकारले आन्तरिक राजश्वबाट २ अर्ब, चालु आर्थिक बर्षमा खर्चबाट बचत हुने अनुमानित रकम ७ अर्ब, संघीय सरकारबाट राजश्व बाँडफाँट वापत प्राप्त हुन आएको रकम ९ अर्ब ६० करोड, वित्तीय समानीकरण अनुदानबाट प्राप्त हुन आएको ९ अर्ब २० करोड, सशर्त अनुदानबाट ६ अर्ब र संघीय रोयल्टीबाट ४ करोड २८ लाख खर्च व्यहोर्ने अनुमान गरेको छ।