प्रतिनिधिसभाको बैठकमा एमाले सांसद सूर्यप्रसाद पाठकले प्रधानमन्त्री शेरबहादुर देउवाको अमेरिका भ्रमणको विषय सदनमा जानकारी गराउन माग गर्नुभएको छ।

पाठकले,प्रधानमन्त्री र प्रधानसेनापतिको अमेरिका भ्रमणले नेपाल कतै इन्डो प्यासिफिक स्ट्र्याटीजीमा सहभागी हुन लागेको हो कि भन्ने आशंका भएको समेत बताउनुभएको छ।

सत्ताधारी दलका प्रमुख सचेतकले राष्ट्रिय सुरक्षा संवेदनशिलताका सम्बन्धमा राखेको अभिव्यक्तीले राष्ट्रिय स्वाधिनता, सार्वभौकिमता र भौगोलिक अखण्डताको विषयमा चिन्तित बनाएको भन्दै पाठकले, यस विषयमा प्रधानमन्त्रीलाई सदनमा जवाफ दिन सभामुखले रुलिङ गर्नुपर्ने माग गर्नुभएको हो।

त्यसो त माओवादी केन्द्रका प्रमुख सचेतक देव गुरुङले पनि प्रतिनिधि सभा बैठकमा राष्ट्रिय सुरक्षा संवेदनशीलतालाई ध्यानमा राखेर प्रधानमन्त्री र प्रधानसेनापतिको अमेरिका भ्रमण स्थगित गर्न माग गर्नुभएको थियो। गुरुङले अहिलेको परराष्ट्र नीति सैन्य नीतिमा गइरहेको समेत टिप्पणी गर्नुभएको थियो।