बिहीबार मध्य चीनको एक आवासीय क्षेत्रमा चिनियाँ सेनाको विमान दुर्घटना हुँदा कम्तीमा एक जनाको मृत्यु भएको चीनको सरकारी राष्ट्रिय प्रसारण संस्था सीसीटीभीले जनाएको छ।

तालिमको दौरान पिपुल्स लिबरेसन आर्मी एयर फोर्सको जे-७ विमान हुबेई प्रान्तमा दुर्घटना हुँदा धेरै घरमा क्षति पुगेको सीसीटीभीले जनाएको छ।दुर्घटनामा एक जनाको मृत्यु भएको र अन्य दुई जना घाइते भएको बताइएको छ।
सामान्य चोटपटक लागेका पाइलटले विमान दुर्घटना हुनुअघि नै प्यारासुटको प्रयोग गरेर विमानबाट सफलतापूर्वक बाहिर निस्किएको मिडिया एजेन्सी सिन्ह्वाले जनाएको छ।

पाइलट र घाइते नागरिकहरूलाई उपचारको लागि अस्पताल पठाइएको छ।
सामाजिक सञ्जालमा प्रसारित भिडियोहरूमा हुबेई प्रान्तको सियानग्याङको लाओहेकोउ एयरपोर्ट नजिकै भएको दुर्घटनाका कारण केही घरहरूमा आगो लागेको देखाइएको छ। दुर्घटनाको कारण र सम्बन्धित क्षतीको अनुसन्धान भइरहेको जनाइएको छ।