त्रिभुवन अन्तराष्ट्रीय विमानस्थलबाट अवैध सुनसहित ७ जना पक्राउ परेका छन्।

नेपाल वायुसेवा निगमको फ्लाइट नं आरए २३० को जहाजमा दुबईबाट काठमाडौं आएका व्यक्तिहरुले सुन ल्याएको भन्ने गोप्य सूचनाको आधारमा प्रहरीले उनीहरुलाई पक्राउ गरेको हो। पक्राउ पर्नेमा रुपन्देहीका ४२ वर्षीय सुरेश बहादुर शाही, कपिलवस्तुका २९ वर्षीय सन्दीप चन्द ठकुरी, बाराका २२ वर्षीय निर्मला घलान, काठमाडौंका ४१ वर्षीय राहुल भन्ने बरुणभक्त माथेमा, र नवलपरासी पश्चिमका ४१ वर्षीय युवराज भुसाल सहित २७ वर्षीय चिनियाँ नागरिक लोप्सन ग्याल्सेन र ५१ वर्षीय भारतीय नागरिक अमन राजपुत रहेको प्रहरीले बताएको छ।

अनुसन्धानको क्रममा उनीहरुले लगाएको सर्ट, पाइन्ट र अन्डरवेयरमा सुन लुकाएर ल्याएको प्रहरीले फेला पारेको थियो। प्रहरीले उनीहरुको साथबाट ८८६ ग्राम सुन बरामद बरामद गरेको छ।