हराइरहेको ताराको ट्विनअटर दुर्घटनाग्रस्त अवस्थामा फेला परेको छ ।१४ हजार ५ सय फिटको उचाइमा मुस्ताङको थासाङ गाउँपालिका २ कोवाङको सानोस्वारे भीरमा दुर्घटनाग्रस्त विमानको भग्नावशेष भेटिएको हो।

कोवाङबाट ३ घन्टामाथि मानापाथी हिमालको फेदीमा पर्ने पहाडमा ठोक्किएर क्षतविक्षत अवस्थामा रहेको जहाज स्थानीयले फेला पारेपछि सेनालाई खबर गरेका थिए । दुर्घटनामा परि जहाजमा सवार सम्पूर्ण यात्रुको मृत्यु भएको आशंका गरिएको छ भने मृत्यु भएकाहरूको शव काठमाडौं ल्याइने भएको छ ।

जोमसोम विमानस्थलमा बाक्लो बादल लागेकोले अवतरण गर्न नसकेपछि निलगिरी हिमालमुनीको टिटी तालको आकाशबाट देब्रे मोडिएर मानापाथी हिमालपट्टी पुगेको र सोही पहाडमा विमान ठोकिएको अनुमान गरिएको छ ।