युवा पुनर्जागरण संगठन नेपाल चितवनले राज्य संयन्त्र र सरकारको कदमको विरोध गर्दै नारायणगढमा मोटरसाइकल र्‍याली गरेको छ।
वैदेशिक हस्तक्षप बन्द गर,सिमा अतिक्रमण बन्द गर,इन्डो-अमेरिकी सेना नेपाल छोड लगायतका नाराहरुसहित नारायणगढको पोखरा बसपार्कबाट सुरु भएको विरोध र्‍याली केन्द्रिय बस टर्मिनल पुगेर कोणसभामा परिणत भएको थियो।

युवा पुनर्जागरण संगठन नेपालका केन्द्रिय अध्यक्ष समुन्द्र क्षेत्रीले सम्बोधन गर्नुभएको उक्त कार्यक्रममा करिब ६० वटा मोटरसाइकल र १०० जना युवाहरुको सहभागिता रहेको थियो। कोणसभालाई सम्बोधन गर्ने क्रममा अध्यक्ष क्षेत्रीले नेपालमा बढ्दै गएको महंगी र पेट्रोलियम पदार्थमा अनियमित तवरले हुने गरेको मूल्य वृद्धिको विरोध गर्दै सरकारले महंगी नियन्त्रण गर्न कुनै पनि दिर्घकालिन योजना बनाएर अघि बढ्न नसकेको भन्दै विरोध जनाउनु भएको थियो। उहाँले देशमा बढ्दो महिला हिँसा ,सिमा अतिक्रमण र वैदेशिक हस्तक्षप विरुद्ध सरकार मौन बसेको भन्दै अब स्वतन्त्र र देशभक्त युवाहरु एक भएर कडा प्रतिकारमा उत्रिने समेत चेतावनी दिनुभएको छ। साथै, उहाँले अब युवा पुनर्जागरण संगठनले हरेक सरकारी निकायमा हुने भ्रष्टाचारको विरुद्ध आफुहरु कडा प्रतिकारमा उत्रिने पनि बताउनुभएको छ।

युवा पुनर्जागरण संगठन नेपाल चितवनले संयोजन गरेको उक्त कार्यक्रममा त्रिमुल नेपाल पार्टीका केन्द्रिय सदस्य सन्त बहादुर घिसिङ्ग, ऋषि खतिवडा र नविन गैरे लगायतको उपस्थिति रहेको थियो।