स्थानीय तहको निर्वाचनका लागि आज राति १२ बजेपछि मौन अवधि लगाइने भएको छ । मतदान सम्पन्न नभएसम्म मौन अवधि जारी रहनेछ।

निर्वाचन धाँधलीरहित, स्वच्छ, निष्पक्ष र भयमुक्त वातावरणमा सम्पन्न गर्न मौन अवधि तोकिएको आयोगले जनाएको छ । मौन अवधिमा राजनीतिक दल, तिनका भ्रातृ संगठन, उम्मेदवार, संघसंस्था र अन्यले राजनीतिक अभियान, जमघट/ गोष्ठी,जुलुस,र्याली ,सभा आयोजना गर्न नपाइने आयोगको आचारसंहितामा उल्लेख गरिएको छ ।

मौन अवधिका लागि जारी गरिएको निर्देशनको पालनाको अनुगमन, नियमन र आवश्यक परेमा उल्लंघन गर्नेलाई कारबाही गर्न विशेष सर्कुलरमार्फत सबै प्रमुख जिल्ला अधिकारीलाई अख्तियार दिइएको प्रमुख निर्वाचन आयुक्त दिनेश थपलियाले जानकारी दिनुभएको छ ।

आयोगका अनुसार मौन अवधिमा निर्वाचन प्रचारप्रसार लगायतका कुनै पनि छलफल, अन्तरक्रिया, भेटघाट, सम्मेलन वा गोष्ठी गर्न पाइने छैन । राजनीतिक दल र उम्मेदवारको प्रचार सामग्री मतदान केन्द्रको ३०० मिटर भित्र लैजान पाइने छैन । मौन अवधि सुरु हुनुअघि नै यस्ता सामग्री हटाउन आयोगले निर्देशन दिएको छ ।

मौन अवधिमा सामाजिक सञ्जाल, अनलाइन, छापा वा अन्य कुनै माध्यमबाट राजनीतिक दल वा उम्मेदवारको पक्ष वा विरुद्धमा सन्देश, सूचना वा प्रचार सामग्री पोस्ट गर्न वा सेयर गर्न पाइने छैन।
त्यसैगरी आजदेखि सम्पूर्ण सिमा-नाका पनि बन्द गरिने आयोगले जनाएको छ।