सत्ता गठबन्धनले आज भरतपुरको केन्द्रिय बस टर्मिनलमा आफ्नो चुनावी सभा गरेको छ। चुनावी सभालाई सम्बोधन गर्ने क्रममा गठबन्धन दलका शिर्ष नेताहरुले दिएको अभिव्यक्ति यस्तो थियो।
शेर बहादुर देउवा
काँग्रेस सभापति देउवाले गठबन्धन टुटाउने षड्यन्त्र भइरहेको भन्दै, आफुहरु सो षड्यन्त्रमा फस्न नहुने बताउनुभएको थियो। साथै उहाँले यो पटक मेयरमा रेणु दाहाललाई समर्थन गर्न आग्रह गर्दै अर्को पटक आफुहरुले नै मेयरमा उम्मेद्वारी दिने आश्वासन समेत दिनुभएको थियो। रेणु दाहालको जित सुनिश्चित भइसकेको भन्दै देउवाले उनैलाई सहयोग र समर्थन गर्न आग्रह गर्नुभएको थियो।

पुष्पकमल दाहाल प्रचण्ड
माओवादी केन्द्रका अध्यक्ष प्रचण्डले चितवन काँग्रेसको माग अनुसार नै आफु गठबन्धनको पक्षमा उभिराख्ने प्रतिवद्धता व्यक्त गर्नुभयो। अघिल्लो पटक गठबन्धनको समर्थकले नै अर्को पार्टीलाई मत दिएको कारण सभापति देउवालाई भनेर नै आफुले एमालेसंग गठबन्धन गरेको कुरा पनि प्रचण्डले बताउनुभएको थियो। तर यो पटक पनि गठबन्धनले साथ नदिए देश दुर्घटनामा पर्न सक्ने उहाँले बताउनुभयो। नेकपा एमालेका केहि साथीहरु अझै पनि मिल्ने सहमति लिएर आएको तर,एमालेसंगको गठबन्धनमा आफुले ठुलो मूल्य चुकाएर ज्ञान प्राप्त गरेको भन्दै उहाँले आफ़ुमाथि शंका नगर्न समेत आग्रह गर्नुभएको थियो। यो पटक गठबन्धनले साथ दिएर गठबन्धनको टिमलाई विजयी गराएमा, गठबन्धनलाई १०-१५ बर्ष सम्म अगाडी बढाउने प्रतिवद्दता समेत उहाँले व्यक्त गर्नुभयो ।

रामचन्द्र पौडेल
नेपाली कांग्रेसका वरिष्ठ नेता रामचन्द्र पौडेलले, एमाले अध्यक्ष केपी शर्मा ओलीले मुलुकलाई अस्थिरतातर्फ लैजान खोजेकाले गठबन्धन गर्नु परेको बताउनुभयो। माओवादी केन्द्रसँग सहकार्य गर्नु परिस्थितिको उपज भएको बताउंदै नेता पौडेलले आफ्नो प्रतिस्पर्धा प्रचण्ड र माओवादीसंग नभएर केपी ओली प्रवृत्तिको एमाले पार्टीसित भएको उल्लेख गर्नुभएको थियो । साथै भोलि मिलेर सरकार बनाउने भए स्थानिय चुनावमा पनि मिल्नुपर्ने नेता पौडेलले बताउनुभयो ।
माधव नेपाल
नेकपा एकीकृत समाजवादीका अध्यक्ष माधवकुमार नेपालले रेणु दाहाललाई पुष्पकमल दाहाल प्रचण्डको छोरीको रुपमा मात्र बुझ्न नहुने बताउनुभएको थियो।कोही योग्य छन् भने आफ्नो योग्यताका आधारमा आउने हुन्,बाबुको आधारमा होइन र योग्य व्यक्तिलाई कसैको छोरी भनेर छेक्न नहुने नेता नेपालले बताउनुभयो।

साथै एमालेलाई कुहिएको फर्सीको संज्ञा दिंदै, नेता नेपालले अहिलेको गठबन्धन पवित्र उद्देश्यले बनाएको र केहि नमिलेको ठाउँमा मिलाउनुपर्ने बताउनुभयो । भरतपुरले विकासप्रेमी मेयर पाएको भन्दै नेता नेपालले रेणु दाहालको प्रशंसा समेत गर्नुभयो।

महालक्ष्मी उपाध्याय

नेपाली कांग्रेसकी सहमहामन्त्री महालक्ष्मी उपाध्याय ‘डिना’ले स्थानीय चुनावमा महिलालाई जिताउनुपर्ने बताउनुभएको थियो। कुल ६ महानगरमा २ जना मात्रै प्रमुखमा महिला उम्मेदवार भएकोले, महिलालाई जिताउने काम सबै महिला दिदीबहिनीहरुले गर्नुपर्ने उहाँले बताउनुभेको थियो। साथै भरतपुरको विकासमा रेणु दाहालले राम्रो काम गर्नुभएको र धेरै पूर्वाधारहरु बनाइसक्नु भएकोले रेणुलाई जिताउन उहाँले आग्रह गर्नुभएको थियो।