नेपाल कम्युनिष्ट पार्टी (नेकपा)को महासचिव पदबाट नेत्रविक्रम चन्दलाई हटाइएको छ ।असन्तुष्ट पार्टी नेता हेमन्तप्रकाश ओली र धर्मेन्द्र बाँस्तोलासहितको राष्ट्रिय भेलाले चन्दलाई पदबाट हटाउने निर्णय गरेको हो ।

पार्टीको केन्द्रीय समितिको निर्णयविपरीत स्थानीय निर्वाचनमा सहभागी भई एमसीसी समर्थक एमाले र कांग्रेससँग गठबन्धन बनाएको भन्दै चन्दलाई महासचिव पदबाट हटाइएको समूहका नेता गुणराज लोहनीले बताउनुभएको छ।

राष्ट्रिय भेलाले केन्द्रीय संयोजकमा धर्मेन्द्र बाँस्तोलालाई नियुक्त गरेको छ भने खड्गबहादुर विश्वकर्मालाई पार्टी प्रवक्ता पदबाट हटाइएको छ ।

केही दिनअघि चन्दले पार्टीको निर्वाचनमा भाग लिने निर्णय विपरीत अभिव्यक्ति दिएको भन्दै धर्मेन्द्र बाँस्तोला र हेमन्तप्रकाश ओलीलाई पार्टीको जिम्मेवारीबाट हटाएका थिए ।