नेपाल राष्ट्र बैंकका कार्यवाहक गभर्नर डा. निलम ढुंगाना तिमिल्सिनाले बैंकिङ प्रणालीमा तरलताको चाप रहेकाले केही समय धैर्य गर्नुपर्ने बताउनुभएको छ ।

काठमाडौंमा भएको तेस्रो राष्ट्रिय लघुवित्त सदस्य सम्मेलनमा बोल्दै कार्यवाहक गभर्नर ढुंगानाले लघुवित्त र समग्र बैंकिङ क्षेत्र तरलता संकटबाट गुज्रिरहेको अवस्थामा सबैले केही समय धैर्यता अपनाउनु पर्ने बताउनुभएको हो । बैंकिङ क्षेत्रमा मात्र नभई लघुवित्तमा पनि तरलता र ब्याजदरको समस्या रहेको उहांले बताउनुभयो ।

कार्यवाहक गभर्नर ढुंगानाले तरलता र ब्याजदरमा आएको उतारचढावका कारण समग्र अर्थतन्त्र र जनता मारमा परेको दाबी गर्दै व्यापार चक्र पनि चक्रवर्ती हुने भएकाले क्रमशः सबैमा सुधार हुँदै जाने बताउनुभएको थियो । गरिबी र वित्तीय पहुँचभन्दा बाहिर रहेका नेपालका २० प्रतिशत जनताका लागि लघुवित्त संस्था प्रभावकारी औजार बनेको भन्दै नेपालमा समावेशी आर्थिक विकासका लागि विभिन्न प्रयास भए पनि नेपालको कुल जनसङ्ख्याको १८ प्रतिशत अझै पनि गरिबीको रेखामुनि रहेको पनि उहांले प्रष्ट पार्नुभयो । उहांले गरिब तथा लक्षित समुदायको आर्थिक उत्थान, लैङ्गिक हिंसा र महिला सशक्तिकरणमा सहयोग र आर्थिक असमानता घटाउनमा लघुवित्तले महत्वपूर्ण भूमिका खेलेको बताउनुभएको थियो।