नेपाली कांग्रेसले स्थानीय तहको निर्वाचनका लागि तत्काल उम्मेदवार टुंगो लगाउन मातहतको कार्यसमितिलाई परिपत्र गरेको छ ।

पार्टीको वडा, नगरपालिका, क्षेत्रीय तथा जिल्ला कार्यसमितिले आगामी निर्वाचनका लागि उम्मेदवार टुंगो लगाउन छलफल गरिरहेको बेला कांग्रेसले मौखिक परिपत्र जारी गरेको छ ।

नेपाली कांग्रेसको संवैधानिक व्यवस्था अनुसार वडाध्यक्ष र वडा सदस्यको उम्मेदवार प्रतिनिधिसभाको क्षेत्रीय संसदीय समितिले छनोट गर्नेछ । त्यसैगरी गाउँपालिका अध्यक्ष र उपाध्यक्षको उम्मेदवार जिल्ला समितिले छनोट गर्नेछ ।

नगरपालिका र उपमहानगरपालिकाको मेयर र उपमेयरको उम्मेदवार प्रदेश कमिटीले र महानगरका मेयर र उपमेयरको छनोट केन्द्रीय कार्यसमितिले गर्नेछ ।