प्रधानमन्त्री शेरबहादुर देउवाले बहुपक्षीय प्राविधिक तथा आर्थिक सहयोगका लागि बङ्गालको खाडीको प्रयास (बिमस्टेक) लाई नयाँ जीवन दिनुपर्ने बताउनुभएको छ । उहांले सदस्य राष्ट्रका स्रोत साधन परिचालन गर्नुपर्ने पनि बताउनुभएको छ ।

श्रीलंकामा भएको सम्मेलनलाई सम्बोधन गर्दै देउवाले बिमस्टेकले कोरोना महामारीको दीर्घकालीन आर्थिक, सामाजिक र विकासमा पर्ने असरलाई सम्बोधन गर्दै सामान्य अवस्थामा फर्किने सुनिश्चितता गर्नुपर्ने बताउनुभएको छ । उहांले यस क्षेत्रका चुनौतिहरूबारे बोल्दै बिमस्टेक सदस्यहरूले व्यापार र लगानी, ऊर्जा, कनेक्टिभिटी, जलवायु परिवर्तन र जनताबीचको सम्पर्कलाई सामूहिक रूपमा विचार गर्नुपर्ने बताउनुभएको छ ।

उहांले बुद्धको जन्मस्थल लुम्बिनीलाई जोड्न जतिसक्दो चाँडो बुद्ध सर्किट बनाउनुपर्नेमा जोड दिँदै बौद्ध धर्म यस क्षेत्रमा बलियो कडी हुने बताउनुभएको छ । यसैबीच, कोलम्बोमा हुने सम्मेलनमा सहभागी परराष्ट्रमन्त्री खड्काले राष्ट्रपति राजापाक्षेसँग भेटवार्ता गर्नुभएको छ ।

राष्ट्रपति कार्यालयमा भएको भेटमा राष्ट्रपति राजापाक्षले दुई देशबीचको लामो समयदेखि रहेको सौहार्दपूर्ण सम्बन्धको स्मरण गर्दै आपसी हितका लागि आर्थिक सम्बन्धलाई थप मजबुत बनाउनुपर्ने बताउनुभएको छ ।