सत्तारूढ दलको बैठक आज बिहान १०ः३० बजे प्रधानमन्त्री निवास बालुवाटारमा बस्दैछ ।आगामी स्थानीय निर्वाचनमा समन्वयका विषयमा छलफल गर्न सत्तारुढ दलको बैठक बस्न लागेको हो ।

सत्तारुढ दलका नेताहरूले स्थानीय निर्वाचन र त्यसपछि हुने प्रदेश र प्रदेशसभाको निर्वाचनमा समन्वय गर्ने बताउँदै आएका छन् ।

सत्तारुढ दल नेपाली कांग्रेसभित्र अहिले पनि समन्वयका विषयमा विवाद छ । तर, प्रधानमन्त्री तथा नेपाली कांग्रेसका सभापति शेरबहादुर देउवा भने चुनावमा गठबन्धन गर्ने कुरामा अडिग छन् । शेखर कोइरालाको प्यानलले कांग्रेसले गठबन्धन नगरी एक्लै चुनाव लड्नु पर्ने बताउँदै आएको छ ।

गृहजिल्ला चितवनमा हिजो पत्रकारसँग कुरा गर्दै माओवादी केन्द्रका अध्यक्ष प्रचण्डले सत्तारुढ गठबन्धनको बैठकले समन्वयका विषयमा निर्णय गर्ने बताउनुभएको छ । कम्तिमा आजको बैठकबाट महानगरको विषयमा निर्णय हुने अध्यक्ष प्रचण्डले बताउनुभएको छ ।

सत्तारुढ गठबन्धनको बैठकमा प्रधानमन्त्री शेरबहादुर देउवाको शुक्रबारको भारत भ्रमण र नेपालले उठाउनुपर्ने एजेण्डाबारे पनि छलफल हुनेछ ।