प्रमुख प्रतिपक्षी दल नेकपा (एमाले)ले प्रधानन्यायाधीशविरुद्धको महाभियोग प्रस्तावको विरोध गर्ने निर्णय गरेको छ ।

महाभियोग दर्ता भएपछि एमालेले सचिवालयको आकस्मिक बैठक बोलाएको थियो । पार्टी अध्यक्ष केपी शर्मा ओलीको निवास बालकोटमा बसेको पार्टीको केन्द्रीय सचिवालय बैठकले महाभियोग प्रस्ताव न्यायपालिका र लोकतन्त्रविरुद्धको षड्यन्त्र भएको भन्दै विरोध गर्ने निर्णय गरेको हो ।

बैठकले सत्तारुढ गठबन्धनले नेपालमा नियन्त्रित अस्थिरता सिर्जना गर्ने उद्देश्यले महाभियोग प्रस्ताव ल्याएको आरोप लगाएको छ ।बैठकपछि पत्रकारहरुसँग कुरा गर्दै एमाले महासचिव शंकर पोखरेलले सत्तारुढ गठबन्धनले लोकतन्त्र विरोधी गतिविधि गरेको भन्दै महाभियोगको विरोध गर्ने र त्यसको विरुद्धमा जनतालाई उभिन आग्रह गरेको बताउनुभएको छ ।

महासचिव पोखरेलले सोमबार बस्ने संसदीय दलको बैठकले महाभियोगबारे प्रतिवाद गर्नेगरी महत्वपूर्ण निर्णय गर्ने पनि बताउनुभएको छ ।