संयुक्त राज्य अमेरिकाले नयाँ इन्डो-प्यासिफिक रणनीति सार्वजनिक गरेको छ ।चीनको प्रभावलाई रोक्न आफ्ना सहयोगीहरूसँग मिलेर बलियो शैन्य रणनीतिक नीतिहरू लागू गर्दै अमेरिकाले नयाँ इन्डो-प्यासिफिक रणनीति सार्वजनिक गरेको हो ।

ह्वाइट हाउसले १२ पृष्ठको इन्डो-प्यासिफिक रणनीति सार्वजनिक गर्दै , नयाँ इन्डो-प्यासिफिक रणनीतिले विश्वभर चीनको बढ्दो सम्बन्ध र प्रभावलाई सुरक्षा र आर्थिक गठबन्धनमा संयुक्त राज्य अमेरिका र उसका सहयोगीहरूका लागि ठूलो चुनौतीको रूपमा वर्णन गरेको छ।

रणनीतिले चीनको बढ्दो सक्रियतालाई रोक्न अमेरिका र इन्डो-प्यासिफिक साझेदारहरूबीच सामूहिक क्षमता निर्माण गर्न आह्वान गरेको छ। रणनीतिमा चिनियाँ व्यवहार संयुक्त राज्य अमेरिका र इन्डो-प्यासिफिक क्षेत्रमा त्यसका साझेदारहरूका लागि हानिकारक रहेको उल्लेख छ।

त्यस्तै, इन्डो–प्यासिफिक क्षेत्रमा रणनीति कार्यान्वयनमा दक्षिण एसियामा शान्ति र स्थायित्वका लागि भारतको भूमिकामा जोड दिइएको छ ।उक्त रणनीतिमा अमेरिकाले भारतलाई आफ्नो ‘मुख्य रक्षा साझेदार’ भनेर स्पष्ट रूपमा उल्लेख गरेको छ। रणनीतिमा दक्षिण एसियामा भारतको उदीयमान स्थितिलाई अमेरिकाले समर्थन गर्ने पनि उल्लेख छ ।

बाइडेन सत्तामा आएको तेह्र महिनापछि वाशिंगटनले नयाँ इन्डो-प्यासिफिक रणनीति सार्वजनिक गरेको छ। बाइडेनको इन्डो-प्यासिफिक रणनीति अघिल्लो ट्रम्प प्रशासनले अपनाएका अधिकांश नीतिहरूको निरन्तरता हो।

विश्व रणनीतिक, आर्थिक र भूराजनीतिक मुद्दामा अमेरिका र चीनबीचको प्रतिस्पर्धाका कारण विश्व झन् ध्रुवीकरण हुँदै गएको बेला बाइडेन प्रशासनले इन्डो–प्यासिफिक रणनीति ल्याएको हो ।

अन्तर्राष्ट्रिय सञ्चारमाध्यमका अनुसार अमेरिकी अधिकारीले यो रणनीतिले विश्वभर जबरजस्ती अमेरिकी सैन्य प्रभुत्व विस्तार गरेर चीनको प्रभावलाई कमजोर बनाउन मद्दत गर्ने विश्वास लिएका छन्।
आफ्नो रणनीतिक योजना कार्यान्वयन गर्न, संयुक्त राज्य अमेरिकाले इन्डो-प्यासिफिक क्षेत्रमा नयाँ दूतावास र वाणिज्य दूतावास खोल्ने, शान्ति सेनाको उपस्थिति बढाउने, र इन्डो-प्यासिफिक आर्थिक संरचनालाई अगाडि बढाउने नीति अपनाएको छ। अमेरिकी रणनीतिमा इन्डो-प्यासिफिक क्षेत्रमा अमेरिकी नौसेनाको भूमिका बढाउने योजना पनि समावेश छ।

यसैबीच, वाशिंगटनमा पत्रकारहरूसँग कुरा गर्दै अमेरिकी राष्ट्रिय सुरक्षा सल्लाहकार जेक सुलिभानले युक्रेनमा रूसको सम्भावित आक्रमणलाई समर्थन गरे चीनले ठूलो मूल्य चुकाउनु पर्ने चेतावनी दिएका छन् ।