संसदीय अन्तर्राष्ट्रिय सम्बन्ध समितिले अवैतनिक वाणिज्यदूतहरुको सवारी साधनमा निलो नम्बर प्लेट र झण्डा राख्ने निर्णय कार्यान्वयन नगर्न सरकारलाई निर्देशन दिएको छ ।

नेपालका लागि किर्गिस्तानका मानार्थ राजदूत सुलभ अग्रवालले कालोबजारीमा कूटनीतिक सुविधाको गाडी प्रयोग गरेको पाइएपछि सरकारले दुई वर्षअघि उक्त सुविधा खारेज गरेको थियो । तर, परराष्ट्रमन्त्री नारायण खड्काले उक्त निर्णय उल्ट्याएर अवैतनिक वाणिज्यदूतहरुको गाडीमा निलो नम्बर प्लेट र झण्डा राख्न पाउने अनुमति दिएका थिए ।

समितिको बैठकले यो सुविधा पुनरावलोकन गर्दा कुनै पनि परामर्श नभएको भन्दै अवैतनिक वाणिज्यदूतहरुको गाडीमा निलो नम्बर प्लेट र झण्डा राख्न नदिन आग्रह गरेको छ । सरकारले यस सम्बन्धमा मापदण्ड बनाएर छिट्टै समितिमा पठाउन पनि निर्देशन दिएको छ।