बतास अर्गनाइजेसन अन्तरगतको बीपीएस लिजिङ एन्ड म्यानेजमेन्टले नारायणहिटी दरबार संग्रहालयभित्र गैरकानुनी रुपमा होटेल निर्माण प्रकृया अगाडि बढाएको छ ।

नारायणहिटी दरबार संग्रहालय तथा गणतन्त्र स्मारक व्यवस्थापन तथा सञ्चालन समितिले दरबारभित्र संरचना थप गर्न काठमाडौं महानगरपालिकासँग अनुमति लिनुपर्दछ । तर त्यस्तो कुनै अनुमती बेगर नै बतास अर्गनाइजेसन अन्तरगतको बीपीएस लिजिङ एन्ड म्यानेजमेन्टले होटेल सन्चालनको निम्ती धमाधम गैरकानूनी ढंगले विभिन्न पक्की संरचना बनाउने र थप्ने काम गरिरहेको छ ।

बतासले नारायणहिटी परिसरभित्रको के कती जमिन उपभोग गर्न पाउने हो भन्ने पूर्णरुपमा तय नै नगरि नारायणहिटी दरबार संग्रहालय तथा गणतन्त्र स्मारक व्यवस्थापन तथा सञ्चालन समितिले मासिक दुई लाख २० हजार रुपैयाँ उठाउने गरी खरिद सम्झौता गरेको छ

तत्कालीन संस्कृति पर्यटन तथा नागरिक उड्डयनमन्त्री योगेश भट्टराई र सचिव यादवप्रसाद कोइरालाको पालामा नारायणहिटी दरबार संग्रहालय तथा गणतन्त्र स्मारक भित्रको जग्गा भाडामा लगाउने निर्णय भएको थियो ।

त्यस्तै बतास अर्गनाइजेसन अन्तरगतको बीपीएस लिजिङ एन्ड म्यानेजमेन्टले पशुपति क्षेत्र विकास कोष अन्तरगतको धर्मशालाभित्र पनि होटल चलाइरहेको छ । धर्मशाला भाडामा दिन पशुपति क्षेत्र विकास कोषको सञ्चालक परिषदको स्वीकृति बेगर तत्कालीन सदस्य सचिव डा. प्रदीप ढकालले लिज कार्यविधि, २०७५ स्वीकृत गरेर २०७५ माघ २९ गते धर्मशाला भाडामा लगाउन सूचना प्रकाशन गराएका थिए ।