निर्वाचन आयोगले आगामी वैशाख १४ गते स्थानीय तहको निर्वाचन गर्न सरकारसमक्ष प्रस्ताव पेश गरेको छ ।
आगामी जेठ ५ गते स्थानीय तहका पदाधिकारीहरुको पदावधि समाप्त हुंदैछ । संविधानको धारा २२५ बमोजिम पदाधिकारीको कार्यकाल समाप्त भएको ६ महिनाभित्र निर्वाचन गरिसक्नुपर्नेछ । तर स्थानीय तह सञ्चालन ऐन अनुसार पदावधि सकिनु २ महिनाअघि नै निर्वाचन गर्नुपर्ने नियम रहेको छ ।
निर्वाचन आयोगको तयारी अनुसार सबै स्थानीय तहको निर्वाचन एकै दिन सम्पन्न गर्नको लागि आगामी वैशाख १४ उपयुक्त हुने र कुनै कारणले एकै दिन निर्वाचन गर्न सम्भव नभए वैशाख २२ गते दोश्रो चरणको निर्वाचन गर्न सकिने प्रस्तावमा उल्लेख गरिएको छ ।