सर्वोच्चको फैसला विपरित एमालेले संसद अवरुद्ध पारिरहेको नेता नेपालको टिप्पणी ।

संसद अवरोध र एमसीसीको बिषयमा छलफल गर्न डाकिएको आजको सर्वदलिय बैठक बिना निष्कर्ष टुँगिएको छ । सत्ताधारी दलहरुबीचमै असहमति भएपछि आइतबारको सर्वदलीय बैठक निष्कर्षविहीन भएको हो ।

बैठकमा सरकारका प्रवक्ता ज्ञानेन्द्रवहादुर कार्कीले एमसीसी संसदबाट अघि बढाउनुपर्ने प्रस्ताव राख्नु भएको थियो भने नेपाल मजदुर किसान पार्टीका नेता प्रेम सुवाल, राष्टिय जनमोर्चा र राष्ट्रिय प्रजातन्त्र पार्टीले एमसीसी सम्झौता पारित गर्न नहुने धारणा राखेका थिए ।नेकपा एकीकृत समाजवादीका अध्यक्ष माधवकुमार नेपालले पनि एमसीसीमाथि उत्पन्न संशयहरूबारे स्पष्ट भएपछि मात्रै त्यसलाई अनुमोदन गर्ने वा नगर्ने भन्ने धारणा बनाउन सकिने बताउनु भयो ।

त्यस्तै नेकपा माओवादी केन्द्रका अध्यक्ष पुष्पकमल दाहाल प्रचण्डले सम्झौता संशोधन गर्नुपर्ने पार्टीको धारणा रहेको बताउनुभएको छ । त्यस्तै नेकपा एकीकृत समाजवादीका महासचिव बेदुराम भुसालले पनि संशोधनविना अगाडि बढाउन नसकिने धारणा व्यक्त गर्नुभएको छ ।जनता समाजवादी पार्टीका संघीय परिषद संयोजक डा. बाबुराम भट्टराईले सम्झौता पारित हुनुपर्ने पक्षमा धारणा व्यक्त गर्नुभएको छ ।यसैबीच सर्वदलीय बैठकले पूर्वप्रधानमन्त्री एवं नेकपा (एकीकृत समाजवादी)का नेता झलनाथ खनाल, पूर्वउपप्रधानमन्त्री एवं नेकपा माओवादी केन्द्रका नेता नारायणकाजी श्रेष्ठ र सरकारका प्रवक्तासमेत रहेका कांग्रेस नेता ज्ञानेन्द्रबहादुर कार्कीलाई एमसिसी अध्ययन गरी सुझाब दिने जिम्मा दिएको छ । यसअघी ओली सरकारको समयमा नेता नेपाल सहितको एमसीसी अध्ययन समितिले, संसोधन गरेर मात्र एमसीसी पास गर्नुपर्ने प्रतिवेदन पेश गरेको थियो ।

बैठकमा प्रमुख प्रतिपक्षी दल एमाले भने उपस्थित थिएन। सर्वदली बैठकले नेकपा एमालेलाई सम्वादमा आउनु आग्रह गरेको छ। बैठकले संसद अवरोध नगरी निकासको वातावरण सिर्जना गर्न एमालेलाई आग्रह गरेको छ । नेकपा (एकीकृत समाजवादी) का अध्यक्ष माधवकुमार नेपालले नेकपा (एमाले)ले सर्वोच्च अदालतको फैसला विपरित संसद अवरुद्ध पारिरहेको बताउनु भएको छ ।