काठमाडौं, असार : यस वर्षको मनसुन शुरु भएदेखि हालसम्म देशका विभिन्न स्थानमा मनसुनबाट उत्पन्न हुने बाढी, पहिरो, डुबान जस्ता प्रकोपका कारण ७७ जनाको ज्यान गएको छ भने ८८ जना घाइते भएका छन् ।

काठमाडौं उपत्यकामा एक, कोशी प्रदेशमा १८, मधेश प्रदेशमा तीन, वाग्मती प्रदेशमा चार, गण्डकी प्रदेशमा २२, लुम्बिनी प्रदेशमा १८, कर्णाली र सुदूरपश्चिम प्रदेशमा चार–चार जनाको मृत्यु भएको प्रहरीले जनाएको छ।

घाइते हुनेमा काठमाडौं उपत्यकाका तीन, कोशी प्रदेशका २१, मधेश प्रदेशका पाँच, वाग्मती प्रदेशका चार, गण्डकी प्रदेशका २६, लुम्बिनी प्रदेशका चार, कर्णाली प्रदेशका १५ र सुदूरपश्चिम प्रदेशका १० जना रहेका छन् ।

कोशी प्रदेशमा ४१ र गण्डकी प्रदेशमा १२ जना गरी कुल ५३ जनाको उद्धार गरिएको छ ।साथै विपदका कारण कोशी प्रदेशमा दुई, वाग्मती प्रदेशमा दुई र सुदूरपश्चिम प्रदेशमा एक जना बेपत्ता भएका छन् । बेपत्ताहरुको खोजी कार्य जारी रहेको प्रहरीले जनाएको छ ।

बाढीले कुल १६१ घर डुबानमा परेका छन् भने ९४ घर, ५३ झुपडी , ४१ पुल, दुई सरकारी कार्यालय र एक विद्यालयमा क्षति पुगेको छ । साथै यस अवधिमा ३ सय ३५ गाईवस्तु मरेका छन् भने २९६ परिवार विस्थापित भएका छन् ।

बाढी र पहिरोको जोखिममा रहेका विभिन्न जिल्लाका परिवारलाई सुरक्षित स्थानमा सार्ने प्रयास भइरहेको छ । प्रहरीले पहिरो पन्छाएर आवश्यक मर्मत सम्भार गरी सवारी आवागमन सुचारु गर्ने काम पनि गरिरहेको नेपाल प्रहरी प्रधान कार्यालयले जनाएको छ ।