वैशाख ९- पोखरा-गण्डकी प्रदेशका मुख्यमन्त्री खगराज अधिकारीले विश्वासको मत प्राप्त गर्न नसकेपछि गण्डकी प्रदेश सरकारमा पनि एमालेको वर्चस्व समाप्त भएको छ। राष्ट्रपती निर्वाचनलाई लिएर सत्ता समीकरणमा आएको फेरबदलको प्रभाव प्रदेश सरकारमा स्पष्ट देखिएको छ।

माओवादी केन्द्रले चैत १० गते आफ्नो समर्थन फिर्ता लिँदै आफ्ना मन्त्रीहरु फिर्ता बोलाएपछि एमाले नेताअधिकारी अल्पमतमा परेका थिए। संवैधानिक व्यवस्था अनुसार सत्ताधारी दलले समर्थन फिर्ता लिएको ३० दिनभित्र मुख्यमन्त्रीले प्रदेश सभामा विश्वासको मत लिनुपर्ने प्रावधान अनुरुप आज विश्वासको मत लिने क्रममा ६० सदस्यीय गण्डकी प्रदेश सभाका २४ सांसद (एमालेको २२ र राप्रपाको २ ) ले मात्र उनलाई समर्थन गरेका थिए। यसअघि उनलाई ३१ सांसदले विश्वाशको मत दिएका थिए।

भोलिसम्म नयाँ सरकार बन्ने

मुख्यमन्त्री खगराज अधिकारीले प्रदेशसभामा विश्वासको मत नपाएर पदमुक्त भएसंगै, नेपाली कांग्रेसको गण्डकी प्रदेशसभा संसदीय दलका नेता सुरेन्द्र पाण्डेले भोलिसम्म नयाँ सरकार बन्ने बताएका छन् ।
यधपी, अब ठूलो दलको नेताको हैसियतमा कांग्रेस संसदीय दलका नेतालाई प्रदेश प्रमुखले मुख्यमन्त्री नियुक्त गर्छन् वा संविधानको धारा १६८ (२) अनुसार सत्ता गठबन्धनको मिलिजुली सरकार बन्छ, त्यो भने हेर्न बाँकी छ।