घरबाट टाढा रहेको एउटा घर हो काठमाडौँ। रोजगारी, उच्च शिक्षा वा अन्य विभिन्न शिलशिलामा काठमाडौँमा बसोबास गर्दै आइरहेका तर काठमाडौँमा घर नभएका देशका सबै नेपालीहरुको आफ्नो घर पछिको घर हो काठमाडौँ। तर दशैँ लागेसँगै यतिबेला नेपालीहरु आ-आफ्नो गाउँघर फर्किएका छन्। अझ भनौँ कर्मथलो छोडेर जन्मथलो फर्किएका छन्। घटस्थापनादेखि नवौँ दिनको अवधिमा मात्रै छ लाख ११ हजार ६५७ जनाले काठमाडौँ छाडेका छन् ।

सँधै कोलाहाल र व्यस्त देखिन काठमाडौँ यतिबेला सुनसान बनेको छ। सडकमा फाट्ट-फुट्ट निजि सवारी ,भाडाका ट्याक्सिहरु र केहि सफा टेम्पो र माइक्रोको आवत-जावत देखिन्छ। अधिकांश पसलका सटरहरू बन्द भइसके । आन्दोलन र प्रदर्शनको प्रतिक जस्तै बनेको माइतिघर पनि यतिबेला शान्त छ। यस्तो लाग्छ ,आवाज बिहिनहरुको आवाज बनेर सिङ्गो समाज र सरकार विरुद्ध विद्रोहको चर्को-चर्को नारा गुञ्जिरहने माइतीघर पनि , चरम युद्धको नेतृत्व गरेर थाकेको सिपाही जस्तो, अहिले विश्रामको अवस्थामा छ। रातको ३-४ बजेसम्म गुनगुनाउने काठमाडौँकै केन्द्र बनेको ठमेल पनि अहिले त सम्साँझैँ सुते जस्तो भान हुन्छ। यस्तो लाग्छ अहिले सिङ्गो काठमाडौँ मस्त निन्द्रामा छ।