सत्तारुढ नेपाली कांग्रेसको पार्टी कार्यालय सानेपामा आज बसेको बैठकले अमेरिकी सहयोग मिलेनियम च्यालेन्ज कर्पोरेसन (एमसीसी) सम्झौता संसदबाट अनुमोदन गर्नुपर्ने निष्कर्ष निकालेको छ ।

सानेपामा आज बसेको बैठकमा स्थानीय तहको निर्वाचन, एमसिसी परियोजना र भ्रातृ संगठनको अधिवेशनका विषयमा छलफल भएको बताइएको छ । आज छलफल भएको बिषयमा भोली सदस्यहरूले धारणा राखिसकेपछि मात्र निर्णयमा पुगिने कांग्रेस प्रवक्ता डा. प्रकाश शरण महतले जानकारी दिनुभएको छ । महतका अनुसार भोली दिउँसो २ बजे बस्ने गरी आजको कार्यसम्पादन समिति बैठक स्थगित गरिएको छ।

बैठकमा एमसीसी संसदमा लगेर अनुमोदन गर्ने बिषयमा छलफल भएको भएपनी गठबन्धनको बिषयमा भने भोलिको कार्यसम्पादन समिति बैठकमा छलफल गरिने भएको छ । तर गठबन्धन तोडेरै भएपनी एमसीसी पारीत गराउन प्रधानमन्त्री एवं पार्टी सभापति शेर बहादुर देउवाको जोडबल देखिएको कारण निर्वाचनमा पनि गठबन्धन नगरि एक्ला-एक्लै चुनावमा जाने सम्भावना बढेको कांग्रेस नेताहरुले बताएका छन् ।

बैठकमा कांग्रेस नेता डा. शशांक कोइरालाले, पार्टीले आफ्नो अस्तित्वका लागि पनि गठबन्धन गर्न नहुने र स्थानीय तह निर्वाचनमा एक्लै प्रतिस्पर्धा गर्नुपर्ने बताउनुभएको छ ।