चितवनको रत्ननगरका बिकर्ण कुमार श्रेष्ठले विश्वमै पहिलो पटक लामो समय पानीमाथी पद्माशन गरेर विश्व किर्तिमान राख्न सफल हुनुभएको छ ।

आइतबार स्कोलाष्टिक फाउडेशन नेपालले भरतपुरमा पत्रकार सम्मेलन कार्यक्रमको आयोजना गरि श्रेष्ठले विश्व किर्तिमान राख्न सफल भएको जानकारी दिएको हो ।

कार्यक्रममा बोल्दै श्रेष्ठले आफूले किर्तिमान राख्दै देशलाई विश्व सामु चिनाउन सकेकोमा खुशी लागेको बताउँदै दृढ इच्छाशक्ति तथा आध्यात्मिक बलले नै आफू सफल बनेको बताउनुभयो ।पानीमा तैरिनु मात्रै नभइ हरेक क्षेत्रमा मिहिनेत र इच्छाशक्ति हुने हो भने सफलता प्राप्त हुने उहाँको भनाइ छ ।

२०७८ साउन १८ गते स्कोलाष्टिक फाउडेशन नेपालको आयोजनामा धुलिखेलमा आयोजित द स्कोलाष्टिक टल्क २०२१ (शिक्षा सम्बन्धी)कार्यक्रममा पानीको सतहमा १ घण्टा ३० मिनेट लगातार तैरिएर वल्र्ड बुक अफ रेकर्डमा किर्तिमान दर्ता गर्नुभएको हो ।

उहाँलाई युवा तथा खेलकुद मन्त्री महेश्वर गहतराज (अथक)ले वर्ड बुक अफ रेकर्डको प्रमाण पत्र हस्तान्तरण गरिसक्नुभएको छ । कार्यक्रममा बोल्दै यो रेकर्ड विश्वमा नै पहिलो पटक कायम भएको स्कोलाष्टिक फाउण्डेशनका अध्यक्ष प्रज्वल भण्डारीले जानकारी दिनुभयो ।

विश्व किर्तिमान राख्न सफल चितवनका श्रेष्ठ अटो पाट्र्स व्यवसायी, बिजुली प्राविधिक प्रशिक्षक, लायन्स क्लव अफ रत्ननगरका पूर्व अध्यक्ष, रत्ननगर जेसिजका पूर्व महासचिव, नेपाल रेडक्रस सोसाइटीका आजीवन सदस्य समेत रहनुभएको छ । यस्तै, उहाँले अहिले सम्म ८३ पटक रक्तदान गरिसक्नु भएको छ ।