काठमाडौँ – अर्थमन्त्री रामेश्वरप्रसाद खनाल र नेपालस्थित जापानका राजदूत मायदा तोरुबिच अर्थ मन्त्रालयमा शिष्टाचार भेटवार्ता सम्पन्न भएको छ।

भेटमा नेपाल–जापानबीचको ऐतिहासिक सम्बन्ध, नेपालको हालको राजनीतिक परिवर्तनपछिको अवस्था र जापानले नेपाललाई प्रदान गर्दै आएको आर्थिक तथा सामाजिक सहयोगबारे विस्तृत छलफल भएको थियो।

अर्थमन्त्री खनालले विशेष परिस्थितिमा बनेको वर्तमान सरकारको प्रमुख उद्देश्य तोकिएको समयमा निर्वाचन सम्पन्न गर्नु रहेको बताए। साथै, उनले पुनःनिर्माण तथा आर्थिक–सामाजिक विकासका कार्यक्रमलाई निरन्तरता दिने प्रतिबद्धता पनि व्यक्त गरे।

भेटका क्रममा निर्माणाधीन नागढुङ्गा सुरुङमार्ग परियोजना, तनहुँ जलविधुत आयोजना, निकट भविष्यमा हुने कोटेश्वर चोक सुधार परियोजना सम्झौता, सिन्धुली सडक बाढी प्रभावित क्षेत्र पुनःस्थापना कार्यक्रमलगायतका विषयमा पनि कुराकानी भएको थियो।