काठमाडौँ- नेपाल प्रहरीले करिब १६ सय पदमा नयाँ भर्ती प्रक्रिया सुरू गरेको छ। प्रहरी प्रधान कार्यालय अन्तर्गतको मानवश्रोत विकास विभागले भर्ना छनोट शाखामार्फत सूचना जारी गर्दै प्रहरी जवानदेखि कार्यालय सहयोगीसम्मका पदमा दरखास्त मागेको हो।

सार्वजनिक सूचनाअनुसार, जनपद प्रहरी जवानका लागि १,५५३, कार्यालय सहयोगी (हजाम) का लागि ११, कुचीकारका लागि १५ र खेलकुद कोटामा १५ पद खुला गरिएको छ। यी पदहरू खुला प्रतिस्पर्धा र समावेशी प्रावधानअनुसार भर्ने उल्लेख छ।

इच्छुक तथा योग्य नेपाली नागरिकले असोज १९ गतेदेखि कात्तिक २८ गतेसम्म दरखास्त दिन सक्नेछन्। खेलकुदतर्फ भने फुटबल, भलिबल, क्रिकेट, एथलेटिक्स, जुडो, कराँते र तेक्वान्दो खेलाडीले मात्र आवेदन दिन पाउने व्यवस्था गरिएको छ।