काठमाडौँ – सरकारले भदौ २३ र २४ गते भएको जेन–जी आन्दोलनका घटनाबारे छानबिन गर्न उच्चस्तरीय न्यायिक जाँचबुझ आयोग गठन प्रक्रिया अघि बढाएको छ।

गृह मन्त्रालयका एक अधिकारीका अनुसार आयोगले घटनाक्रममा राज्य निकायका कमजोरी र जिम्मेवारीबारे छानबिन गर्नेछ। उनले भने, “यससम्बन्धी निर्णय अब बस्ने पहिलो मन्त्रिपरिषद् बैठकमै हुनेछ।”

मन्त्रालयले आयोग गठनका लागि विज्ञको रोस्टर तयार गरी कार्यक्षेत्र समेत टुंगो लगाइसकेको छ।आयोग तीन सदस्यीय हुनेछ र बाँकी सदस्यहरूको नाम पनि लगभग पक्का भइसकेको छ।

यसअघि प्रधानमन्त्री सुशीला कार्कीले मन्त्रिपरिषद् विस्तारपछि बसेको पहिलो बैठकमै जेन–जी आन्दोलनमा भएको दमनबारे छानबिन गर्न उच्चस्तरीय समिति गठन गर्ने निर्णय गरेकी थिइन्।