मकवानपुर — मकवानपुर र बारा सिमानास्थित हेटौँडा उपमहानगरपालिका–१५, चुरियामाईमा पूर्व–पश्चिम राजमार्गमा नेपाली सेनाको ट्रक दुर्घटना हुँदा १६ जना सैनिक घाइते भएका छन्।

मंगलबार दिउँसो करिब २ः५० बजे तनहुँस्थित नं. २ राजदल गणबाट उपसेनानी हर्ष बिक्रम अधिकारीको कमाण्डमा धनुषातर्फ जाँदै गरेको सैनिक टोली सवार ट्रक दुर्घटना भएको हो।

सडक किनारको पुलबाट करिब १०–१२ फिट तल खोल्सामा खस्दा १६ जना सैनिक घाइते भएका हुन्। घाइतेमध्ये तीनजनाको अवस्था गम्भीर रहेको र अन्य सामान्य घाइते भएको जिल्ला प्रहरी कार्यालय मकवानपुरले बताएको छ।

घाइतेहरूलाई तत्काल उद्धार गरी हेटौँडा अस्पताल पठाइएको प्रहरीले जनाएको छ।