काठमाडौं — “जेन जी”आन्दोलनका क्रममा गम्भीर घाइते भएका दुईजनाको उपचारको क्रममा मृत्यु भएको छ। वीर अस्पतालको भेन्टिलेटरमा उपचाररत ती घाइतेको मृत्यु भएको अस्पताल स्रोतले बताएको छ।

प्रदर्शनका क्रममा मृत्यु हुनेको संख्या ७२ पुगेको छ। मुख्य सचिव एकनारायण अर्यालका अनुसार ५९ जना प्रदर्शनकारी, १० जना कैदी बन्दी र ३ जना सुरक्षाकर्मीको मृत्यु भएको छ। १३३ जना प्रदर्शनकारी र ५७ सुरक्षाकर्मी घाइतेको उपचार जारी रहेको छ।

उपचारमा संलग्न न्युरो सर्जन डा. राजीव झाका अनुसार दुवै जनालाई टाउकोमा गोली लागेको थियो र भेन्टिलेटरमा राखेर उपचार भइरहेका थिए, तर जीवन बचाउन सकिएन। मृतकहरूको पहिचान भने खुलाइएको छैन।

केहि समय अगाडी मात्र चाबहिल चुच्चेपाटीस्थित भाटभटेनीमा जलेको अवस्थामा ६ जनाको शव भेटिएको थियो भने मृतकको संख्या अझै बढ्न सक्ने अनुमान गरिएको छ।