कियभ – युक्रेनले रूसी राष्ट्रपति भ्लादिमिर पुटिनले राष्ट्रपति भोलोदिमिर जेलेन्स्कीलाई शान्ति वार्ताका लागि मस्को आउन गरेको प्रस्ताव अस्वीकार गरेको छ।

पुटिनले बुधबार बेइजिङमा पत्रकारहरूसँग कुरा गर्दै भनेका थिए कि वार्ताले सकारात्मक नतिजा दिन सक्ने अवस्थामा मात्र जेलेन्स्की मस्को आउन सक्नेछन्।

युक्रेनी परराष्ट्र मन्त्री आन्द्रेई सिबिगाले ‘एक्स’ मा लेख्दै हंगेरी, स्विट्जरल्याण्ड र टर्किएसहित कम्तीमा सात देशले सम्भावित वार्ताको लागि आतिथ्य दिन प्रस्ताव गरेको बताएका छन् । उनले जेलेन्स्की कुनै पनि समयमा वार्ताका लागि तयार रहेको तर पुटिनले “जानाजानी अस्वीकार्य प्रस्ताव” गरिरहेको आरोप लगाउँदै रुसमाथि थप अन्तर्राष्ट्रिय दबाब दिनुपर्ने माग गरेका छन् ।

पुटिनले जेलेन्स्कीको पाँच वर्षे कार्यकाल गत वर्षै सकिएको र मार्शल ल’का कारण नयाँ निर्वाचन नभएको उल्लेख गर्दै उनले जेलेन्स्कीको वैधानिकतामा पनि प्रश्न उठाउँदै आएका छन्।

स्थायी शान्तिका लागि युक्रेनले आफ्नो नयाँ सिमाना मान्यता दिनुपर्ने र नेटो सदस्य बन्ने योजना परित्याग गर्नुपर्ने रुसले दाबी गरेको छ।