काठमाडौं — सरकारले सञ्चार तथा सूचना प्रविधि मन्त्रालयमा दर्ता नभएका सामाजिक सञ्जालमाथि प्रतिबन्ध लगाउने निर्णय गरेको छ। बिहीबार मन्त्रालयमा बसेको बैठकमा मन्त्री पृथ्बीसुब्बा गुरुङ, मन्त्रालयका अधिकारीहरू, दूरसञ्चार प्राधिकरण, टेलिकम कम्पनी र इन्टरनेट सेवा प्रदायकका प्रतिनिधिहरू सहभागी थिए।

बैठकको निर्णय अनुसार सूचीकृत नभएका सबै सामाजिक सञ्जाललाई रोक लगाइनेछ र यसका लागि मन्त्रालयले कम्पनीहरूलाई आधिकारिक पत्र पठाउने तयारी गरेको छ। यो निर्णय आज रातिदेखि नै लागू हुने जनाइएको छ।

सरकारले यसअघि सात दिनभित्र अनिवार्य रूपमा दर्ता गर्न सामाजिक सञ्जाल कम्पनीलाई समय सीमा दिएको थियो, तर बुधबार राति सकिएको उक्त समयसम्म कुनै पनि ठूला कम्पनी दर्ता प्रक्रियाका लागि सम्पर्कमा आएका छैनन्।

हालसम्म मेटा, अल्फाबेट, एक्स, रेडिट, लिंक्डइनजस्ता ठूला कम्पनीहरूले मन्त्रालयसँग दर्ता प्रक्रियाबारे पहल गरेका छैनन्। सरकारले तोकिएको समयसीमा भित्र दर्ता नगर्ने सामाजिक सञ्जालहरूलाई क्रमशः बन्द गरिने चेतावनी दिएको थियो।